氣溫下降，冰條們應如何自處？（飲食篇）

我相信我身邊不乏冬天會手凍腳凍，長期身穿羽絨+數件heattech，仲會請我食凍柑既朋友。

為左吾洗再食凍柑，我決定將keep warm既秘訣洩露出去！

 

首先係飲食方面，一定不可以節食，依照營養金字塔（小學學既野，好似係最淺白既知識，但有幾多人努力遵守？），包括澱粉質， 蛋白質，脂肪，仲有纖維同微量元素。冬天飲食有什麽注意：

 

1. 不可以戒澱粉質，澱粉質是維持身體能量既重要能源，冬天一碗熱辣辣的米飯、麵 or粥，絕對係禦寒佳品。盡量避免生冷凍飲。

 

2. 肉，溫補既肉類大家都知道---羊肉，羊腩煲，通常呢d羊肉都帶有皮，中間帶有少少肥（正啊），一次過可以滿足蛋白質與脂肪的要求。中醫角度，羊肉有補虛勞，祛寒冷，溫補氣血及助元陽的效用，對手腳冰冷、成日請我食凍柑既人有溫補作用。羊肉係高熱量、高蛋白的紅肉，羊腩煲雖然好正，但偏鹹同油膩，不可以經常食，否則血壓血脂隨時爆煲。 白肉方面，雞係屬於溫性， 雞湯係很好的溫補食品，煲之前去皮，可以減少油份。韓國的人參雞湯好正。不過有感冒的話就盡量避免進食溫熱既食品啦。

 

3. 魚類含較多不飽和脂肪酸如omega-3,其中三文魚是一個好的選擇（當然是熟食三文魚，不是刺身）。進食多點“好”的脂肪，絕對有助禦寒！Omega-3能降低血液中的LDL“不好”膽固醇和甘油三酸酯量，同時提升HDL“好”膽固醇量。它也能令血管變得更暢通及更有彈性，可以減低心臟病發作或中風的風險。冬天濕度較低，除了敷多d補濕mask外，omega-3攝取充足亦可以令皮膚均衡保濕、油潤有光澤。

 

4.天氣冷，羊腩煲、雞煲、打邊爐都是gathering頭號選擇，偏油膩同多肉既飲食容易產生便秘，大家記住打邊爐先食菜，同埋返屋企要食返個juicy水果啊。

 

5. 現代都市人每餐營養都很豐富，甚至過剩，基本上只要均衡飲食，沒有嚴重偏食，微量元素的攝取都足夠。不需要額外添加營養補充品。

 

開診時間通告

由1/11/2014開始，本診所開放時間為:
星期一至六: 09:30-1400, 15:30-19:00
*星期三: 09:30-16:00。敬請留意!

22/11/2014(六) 下午休診

李上琦中醫診所--三九天灸

什麽是三九天灸？

「三九天」處於冬季，三天分別為「一九」、「二九」和「三九」，計算方法以「九」為單位，由冬至開始計算第一天至第九天為「一九」；第十至第十八天為「二九」；第十九至第廿七天為「三九」。

三九天灸療法與夏天的「三伏天」天灸療法本質基本相同，是通過把辛溫的藥物敷於穴位上，引起穴位局部皮膚的充血，甚至起泡，通過經絡的調節作用，調動機體免疫功能，達至行氣活血和加強人體的陽氣的效果，從而改善屬虛寒性的疾病，例如哮喘、鼻敏感、慢性腸胃疾病等。

夏天曾接受「三伏天」治療的病人，可同時接受三九天灸療法。三九天灸還能夠加強和鞏固「三伏天」的療效。部份病人接受「三九天」治療後咳嗽或氣喘等的症狀有明顯改善，感冒次數減少，過敏現象減輕，身體的免疫力和體力亦會提升。

適用於患有慢性疾病，如

鼻敏感，慢性支氣管炎，哮喘，容易反覆感冒，慢性泄瀉，畏寒，胃痛、痛經、關節痛、腰腿痛等虛寒症。

三九天灸日期

 初九：          2014年12月22日 （星期一）

 二九：          2014年12月31日 （星期三）

 三九：          2015年 1月  9日  （星期五）

 加強灸：      2015年 1月17日 （星期六）

不適合治療人士

1. 孕婦或嬰兒(二歲以下)
2. 皮膚過敏者、對中西藥過敏人士
3. 哮喘處於急性發作期者
4. 發燒、咽喉發炎、肺結核、嚴重心肺功能不足者
5. 患皮膚病、容易出現皮膚過敏、或有增生性瘢痕者.

收費：每伏＄120，一次過繳付4次費用則450/4次

地址：九龍佐敦庇利金街14-20號富利商業大廈8樓01室     

電話：9542-5955 （敬請預約）

 

 

食蟹攻略

大閘蟹跟其他蟹一樣屬於寒涼之品。脾胃虛寒的人進食後可能出現胃痛胃脹、腹痛、腹瀉等症狀。平時容易手腳冰冷的女性，如剛碰上月經期，宜淺嘗，不然可能會出現或加重痛經。

 

請留意以下食蟹要點，等大家食得開開心心！

 

1．蟹的腸胃、腮等易匿藏寄生蟲、蟹心（乳白色、六角形）更是至陰至寒，開波前要清理乾淨。

2．蒸煮時需加上紫蘇葉（紫蘇有芳香辟穢、辛溫散寒而解魚蟹毒之功）。

3．準備鎮江醋與薑絲，兩者均為溫性，既能解蟹肉之寒，又能解蟹膏的膩，一舉兩得。

4．邊食蟹邊喝薑湯。材料為水、片糖、薑片。（分量任意，最緊要岩口味）

5．食蟹前先吃粥等熱食打底，粥有養胃作用，其中以雞粥為佳，雞性溫，而好味，哈。

6．忌與柿子一起進食，柿中的鞣質與蟹類的蛋白質結合後，會產生不溶於水的沉澱物，能引起腸胃不適。其他含鞣質的食物，如連皮的蘋果、山楂、茶飲等也不適宜與蟹類同食。

 

孕婦就忍一忍啦。

 

祝大家食的開心！

 

以上資料由李上琦中醫師提供

 

 

 

 

秋天天氣乾燥，飲多d水可以解決？

秋天濕度低，天氣乾燥，令人眼乾、鼻乾、口乾、喉嚨乾、口唇甩皮、皮膚脫屑、大便秘結。中醫來講，秋天燥邪當道，傷害人體津液，出現各種以乾燥為主的症狀。

 

水同津液究竟有什麽不同？水，清澈、稀薄而流動性大；津液，包括人體各種生理水液（胃液、唾液、腸津、關節液），質地較濃稠、渾濁而流動性少，包括的精微物質（養分）比較多。縱然汗與尿液質地跟水較爲相近，但裏面包含的內容複雜，而且質地比清水相對混濁，其屬於生理代謝物。故曰：「汗與小便，皆可謂之津液，其實皆水也」。

中醫治法，燥則潤之。什麽為之“潤”的東西？女孩子應該有體會，就好似夏天護膚品以清爽、較薄而且易推爲主，秋冬就可以用厚身、較“立”的乳液。通常潤的東西質地比較厚、濃稠，適合抵抗秋冬之乾燥天氣，譬如油潤的芝麻、清潤的蜂蜜、銀耳、濃厚的乳製品（牛奶、乳絡）等具有滋潤作用。

 

光喝水，又可不可以潤燥呢？水太清澈，只能補充水分，未能補充津液。每天8杯水？喝水量應該是因人而異的，難道細小的李醫師，喝水量跟姚明一樣？身體需要多少喝多少。如果喝水以後，小便頻而清長，好快又急，證明身體不需要的多餘水分會快快排走。從水到尿液，需要經身體運化，更需要身體熱力（陽氣）；喝太多水未必能潤燥，排尿亦會令陽氣一起排走，可能令身體越累。

 

除了進食潤燥之物，皮膚護理亦不容忽視。人體皮膚呈弱酸性，酸鹼度是5.5-6.5，所以可以選擇弱酸性的護膚產品，有助鎖水。皮膚情況許可，也可以夜間用精油按摩臉部，直到粘手感減少。

 

*血液、津液同屬陰液，主要區別為津液行於脈外，血液行於脈內。

**津與液又可細分，但非是次重點，並不論述。

 

以上資料由李上琦中醫師提供。

中秋後清清個八月十五

中秋節做節又雞又蝦，大吃特吃之後，覺得飽飽滯滯，頂住頂住，第二朝好似吾使食野甘？大便不爽又好臭？胃氣多，仲有口氣添？

 

恭喜你！我應該為你有豐盛既食物而感到高興，即使你已經食滯左。

 

解決辦法：

1.  當然係飲食清淡先，再塞落去吾掂。請注意，飲食清淡並不等於skip meal.

 

2.  多飲水。清一清因爲食滯帶來的腸胃熱毒，減低口氣以及大便臭既程度。

 

如果經過以上2個step，腸胃都未見改善，可以試下以下簡單方法：

1.  飲日韓既飲料—麥茶。大麥茶是將大麥焙煎，再磨成粉末而製成的飲品。大麥有去食療脹、消積進食的功效，性平，適合各體質飲用。

 

2.  如果食肉食得太多的話，可以阿媽or老婆煲湯（不包括藥材湯及瓜菜湯）時，落一角陳皮，小量山楂，同一小撮生薏米，甘就一家大小，各體質都可以飲。（孕婦慎用）

 

 

3.  針對胃部不適，在上腹部（大概雞心位和肚臍中間位置）順時針按摩，如果期間有胃氣呃出更佳。另外針對大便的問題，可以參考《結恭》一章。

 

4.  順帶一提，山楂餅及樽裝山楂飲品含糖量極高，並未能發揮消滯效果，反而加重腸胃負荷。

 

以上資料由李上琦中醫師提供

 

虛不受補？

時下的人經常會講：“醫師，我虛不受補，吾好開補藥我！”

 

如何解讀這句話？

 

“虛則補之，實則瀉之”，係中醫治療裏面一條好重要既法則。虛証，即係身體某些臟腑出現不足既情況，治法當然係補給不足既物質。一般人心目中，補藥只有當歸、北耆、鹿茸……其實呢d係屬於溫補既中藥。另外有滋陰既中藥，也有補益效用，譬如生熟地、玉竹、沙參、石斛……仲有平補既中藥，性質溫和，好多時係屋企湯水都會出現既淮山、雲苓、薏米、芡實等等。

 

究竟人既身體係吾係甘單純，“虛”就只有單純既虛？當然無甘簡單，人體好多時係“虛”既基礎上面，夾雜“實”既症狀。用個例子簡單解釋一下：A先生前排看世界盃成日熬夜，出現陰虛症狀，好似口乾，訓教多夢，皮膚乾燥，繼而出現熱氣既症狀，如生飛玆、暗瘡、便秘、喉嚨痛等。中醫師當然要先幫A先生清熱，仲要滋陰，即係補中帶瀉。

 

所以個人認爲虛不受補既説法吾成立，虛既一定係要補，但要依從每個人不一樣既體質入手，選擇吾同性質既補益藥材（如溫補、滋陰、平補等），更有需要結合吾同既治法（如清熱、活血、行氣等）。千祈，記得，吾好亂補。

 

以上資料由李上琦中醫師提供

 

 

大暑，好熱。。

大暑，阿媽婆婆輩今晚一定會煲包含冬瓜既湯水。

 

如果你今天有在室外運動、勞動，出了一身大汗；或者覺得個人有稍稍好似想中暑的感覺，譬如口乾渴，疲倦，皮膚熱，小便好黃量少，平常體質比較壯實既人就適合飲用包含冬瓜既湯水。

 

但今日係working day(so sad,我都想陽光與海灘)，大家都坐冷氣office返工，中午仲可能飲左杯凍飲。如果你本身比較怕冷，容易手凍腳凍，小便容易頻密，大便容易屙爛，就要避免飲冬瓜湯啦，無暑而清利暑溼，會傷到正氣架。甘阿媽煲左，比個面，飲半碗好啦，吾係夜晚起身屙夜尿。

 

以上資料由李上琦中醫師提供

 

開診時間通告

1/7 （二）照常營業

5/7（六）， 7/7（一）， 26/7（六）上午休診，下午照常應診

 謝謝！

女人之苦[四]。。。不分年齡，帶下你要懂。

女人要經歷經、帶、胎、產， 上回講完“經”，今次講下“帶”。平時診症，遇見女病人，有時都會問下有關帶下既問題。大部分時候對話内容是甘的：“你白帶有無異常？”“咩係白帶？”or“點先係異常？吾識分wor”

 

“咩係白帶？”

 

白帶係女性青春期以後，從陰道滲出既一d粘液，白色，稀糊狀，量不多。陰道正常ph值係3.8-4.2，屬酸性，防止病菌繁殖；陰道可與外界相通，白帶作用除左係濕潤陰道，仲可以清潔陰道，消滅陰道細菌，可以話係一個天然保護屏障。白帶異常係陰道炎既其中一個症狀。

 

“點先係異常？吾識分wor”

 

白帶有以下情況，就係異常：

[1] 色：黃、綠、灰白、啡、夾有血絲

[2] 味：臭、腥味、甚至魚腥味

[3] 量：多（可令小褲褲過底）

[4] 形：豆腐渣樣、稀薄漿液夾有泡沫、膿樣、黃水

 

以上既白帶症狀，除左量多一項以外，只要中左一樣，已經代表白帶異常，通常白帶異常仲會有埋外陰痕癢添

。

點解上面要撇除量多呢一項呢？是甘的，女性係兩次月經中間會有排卵期，排卵受荷爾蒙影響，會分泌蛋清樣既分泌物，簡單黎講，即係白帶會變得量多，色透明，仲好粘，可以拉到好長，大概維持2-3天。呢種白帶雖然量多，但係生理性既變化，所以屬於正常。

 

頭先講到陰道屬酸性，其實裏面亦都有好多益菌。身體虛弱免疫力低（正氣不足）、不注意個人衛生、性生活頻繁都會令益菌減少，增加白帶異常同陰道炎既風險。

 

吾好以爲白帶同陰道炎只係同年輕女性有關，其實已收經既女士或者婆婆級既都要留意，如果陰道突然出現血性既分泌物，又或者有d黃黃綠綠啡啡，兼夾有異味既帶下，就要即刻就醫啦。

 

以上資料由李上琦中醫師提供

 

 

邊個食得龜苓膏？？

龜苓膏係我地南方既產物，成份以金錢龜既龜板，土茯苓為主，加上其他中藥材（間間配方吾同）。以清熱解毒、排毒、增強免疫力作爲招徠。

 

金錢龜依家係受保護物種，所以一般都用番普通龜板。龜板性味甘、鹹，寒，滋陰潛陽，常用於陰虛内熱既人。土茯苓，甘、淡，平，清利濕熱解毒，可用於瘡瘍腫毒。金銀花，蒲公英，菊花，槐花，以上既都係龜苓膏既常用配方，呢d都係清熱解毒，性味寒涼既中藥。
  

廣告裏面，成日標榜對暗瘡、皮膚濕疹有好大幫助，真吾真？

 

之前既芒果濕熱文章中提過，凍、寒涼既野傷脾胃，令寒濕停留，加重濕疹；龜苓膏雖然有d配方會加入地膚子、白癬皮等利濕止癢既皮膚藥，都吾夠抽，因爲其他材料太寒涼，脾氣虛弱，區區兩味止痕藥幫助不大。

 

暗瘡如果是偶爾有發，色紅，膿包突出，伴有口苦，大便秘結，眼有紅筋，眼屎眼膠等，吃少少一盅半盅的確可以有幫助；但若果暗瘡長期反復發作，色暗表面無膿點，過了一兩星期都原封不動既，坊間叫石頭瘡，亦中醫講既“陰性瘡瘍”，食龜苓膏既話就會爛面得更嚴重。因爲本身陽氣不足，吾能夠將膿托出，再食寒涼既龜苓膏削弱正氣，就會令病情更複雜啦。

 

如果以上講得太複雜，又脾虛又陽氣又托膿，吾怕，請你緊記：

 

凡食完龜苓膏之後出現腹痛、大便爛、小便頻密、頭暈，好疲倦、痛經，或者本來就有既慢性問題（如上述既濕疹、暗瘡）嚴重左，就代表龜苓膏吾適合你體質嘍。

 

龜苓膏好似安宮牛黃丸一樣，比人打造成有病醫病，無病補身既補健品，又係商人搵錢既伎倆（驚被人打，哈哈）。

 

病從口入，禍從口出，共勉之！

 

以上資料由李上琦中醫師提供。