邊個食得龜苓膏？？

龜苓膏係我地南方既產物，成份以金錢龜既龜板，土茯苓為主，加上其他中藥材（間間配方吾同）。以清熱解毒、排毒、增強免疫力作爲招徠。

 

金錢龜依家係受保護物種，所以一般都用番普通龜板。龜板性味甘、鹹，寒，滋陰潛陽，常用於陰虛内熱既人。土茯苓，甘、淡，平，清利濕熱解毒，可用於瘡瘍腫毒。金銀花，蒲公英，菊花，槐花，以上既都係龜苓膏既常用配方，呢d都係清熱解毒，性味寒涼既中藥。
  

廣告裏面，成日標榜對暗瘡、皮膚濕疹有好大幫助，真吾真？

 

之前既芒果濕熱文章中提過，凍、寒涼既野傷脾胃，令寒濕停留，加重濕疹；龜苓膏雖然有d配方會加入地膚子、白癬皮等利濕止癢既皮膚藥，都吾夠抽，因爲其他材料太寒涼，脾氣虛弱，區區兩味止痕藥幫助不大。

 

暗瘡如果是偶爾有發，色紅，膿包突出，伴有口苦，大便秘結，眼有紅筋，眼屎眼膠等，吃少少一盅半盅的確可以有幫助；但若果暗瘡長期反復發作，色暗表面無膿點，過了一兩星期都原封不動既，坊間叫石頭瘡，亦中醫講既“陰性瘡瘍”，食龜苓膏既話就會爛面得更嚴重。因爲本身陽氣不足，吾能夠將膿托出，再食寒涼既龜苓膏削弱正氣，就會令病情更複雜啦。

 

如果以上講得太複雜，又脾虛又陽氣又托膿，吾怕，請你緊記：

 

凡食完龜苓膏之後出現腹痛、大便爛、小便頻密、頭暈，好疲倦、痛經，或者本來就有既慢性問題（如上述既濕疹、暗瘡）嚴重左，就代表龜苓膏吾適合你體質嘍。

 

龜苓膏好似安宮牛黃丸一樣，比人打造成有病醫病，無病補身既補健品，又係商人搵錢既伎倆（驚被人打，哈哈）。

 

病從口入，禍從口出，共勉之！

 

以上資料由李上琦中醫師提供。

 

 

 

 

 

“結恭”。。。

“結恭”即係便秘。便秘既定義係大便次數減少，大便量減少或者大便變硬。都市人大概十個人就有1.4個人有便秘（吾係老作，from 2014年衛生署）。

 

偶爾食滯，或者食蔬菜生果少左，都會出現短暫性既便秘，一般三幾日腸胃就會自我調節，可以自愈。有d人長期都便秘，稱之爲習慣性便秘。引起便秘有好多成因，除左多飲水，食多d高纖維野，仲有咩要注意？

 

1．進食分量不足

 

食得少，特別係澱粉質（飯、面之類）。有人話：點解我成日都無便意？明明已經淨係食菜，油都無滴，好健康啊！錯。便意既形成係需要一定既mass（呢個mass大部分由主食既渣滓去組成），去到直腸時刺激大腦，令到有便意產生。仲要一滴油都無？！好多人聽到油呢個字已經好驚，油令人有好多聯想，油，肥，肚腩，塞血管，心臟病，中風。。。其實脂肪有潤便的功用，脂肪酸亦係可以刺激腸蠕動，好既脂肪酸仲可以維持免疫和心血管功能。明明以前中學都學過，carbohydrate, protein, fat係最重要，點解依家d人會甘驚carbohydrate & fat？而一d只需攝取小量既微量元素，就去買一樽兩樽三樽去日日啪？（吾好意思，小小離題）請緊記小學中學雞時學既均衡飲食原則。

 

2．運動不足

講真返工甘忙，得閒偷到少少時間做兩野鄭多燕已經大呼好彩，試問有幾個人每日有30 分鐘帶氧運動？運動少，腸蠕動不足，大便費力兼難有便意。如果有便秘問題，有兩個攤響床都做到既動作，幫腸臟局部運動，不妨參考下。

（一）在床上俯臥，肚皮緊貼住床，進行腹式呼吸。吸氣脹肚時張床會產生阻力，令吸左既氣充分按摩腸臟，加速蠕動。每次約5分鐘。

（二）仰臥，面向天，按摩腹部穴位天樞（肚臍水平，肚臍向左右旁開三指寬處），按摩時需要小小力度，滲透到腹膜下。兩邊同時按摩，都係每次約5分鐘。

 

祝大家身心舒“暢”！

 

以上資料由李上琦中醫師提供。

天灸療法

什麽是天灸？

 

天灸療法是在一年中一些特定日子，利用辛溫助陽藥外貼於人體特定的穴位或患處，利用藥物的刺激作用，引起穴位局部皮膚的充血，甚至起泡，通過經絡的調節作用，調動機體免疫功能，達到治療疾病的作用

 

適用于患有慢性疾病，如

鼻敏感，慢性支氣管炎，哮喘，容易反覆感冒，慢性泄瀉，畏寒，胃痛、痛經、關節痛、腰腿痛等虛寒症。

天灸日期

初伏：    2014年7月18日 （星期五）

中伏：    2014年7月28日 （星期一）

末伏：    2014年8月7日  （星期四）

加強灸：  2014年8月17日 （星期日）

**不適合治療人士

1. 孕婦或嬰兒(二歲以下)
2. 皮膚過敏者、對中西藥過敏人士
3. 哮喘處於急性發作期者
4. 發燒、咽喉發炎、肺結核、嚴重心肺功能不足者
5. 患皮膚病、容易出現皮膚過敏、或有增生性瘢痕者.

收費：每伏＄120，一次過繳付4次費用則450/4次

李上琦中醫診所 九龍佐敦庇利金街14-20號富利商業大廈8樓01室

電話：9542-5955 （歡迎查詢，敬請預約）

 

 

女人之苦[三]。。。

呢回講既係一個我以前都試過犯既錯。。。係咩？係洗頭。

 

甘即係阿婆話個d m黎吾好洗頭？相信大部分女士聼到都已經好驚。作爲一個現代既中醫師，我相信大家都需要顧及個人衛生既。我今次講既係洗頭后有咩注意。

 

以前（好耐好耐之前）因爲電攣左頭髮，怕夜晚洗完吹完靚靚，到訓覺會責到扁曬，所以會早d起身洗頭，然後又發覺返工返學趕時間，就快快趣趣印乾，吾滴水出門口，重會冧：一陣上地鐵/巴士/小巴有冷氣重快乾啦，haan返d時間。以上係錯誤示範。

 

依家講下點解阿婆話黎m吾好洗頭，講起有段故。以前比阿婆更早既時代，醫學吾昌明，醫生更寥寥可數，搵醫生可能要行幾日出省城。女士如果出現子宮大量出血（通常發生係生完小朋友之後--血崩），土法就係將產婦既頭髮用水（普通井水）整濕，因爲個頭濕冷水可以令子宮收縮，有止血既作用。That’s why古人好少洗頭，洗完會先用布絞乾，再係太陽底下自然風乾。

 

所以女士們，特別係留長髮既女士，洗完頭應該儘快用風筒既暖風將頭髮吹乾，要暖風哦！除左個頭濕冷會令子宮收縮引發痛經，更加直接既係引起頭痛。頭為“諸陽之會”，最忌風寒濕，濕冷既頭髮加冷風，風寒濕交結阻塞頭部經絡，不通則痛。

 

注意生活小細節，大家都可以輕易養生。

 

以上資料由李上琦中醫師提供。

 

 

女人之苦[二]。。。

上一回講到預防痛經要戒凍飲，今次就講下衣著同起居有mud野注意。

 
衣著

 今年fashion似乎興短chit chit上衣露臍裝，加短裙短褲，再踢拖。通常甘樣著，都係行下街食下飯，應該吾會甘著去行山、戶外打波卦？係市區游走，周圍都係冷氣，室外室内溫差大，一入冷氣地方，寒邪就首先襲擊露左出黎既肚dum。同上回講既理論一樣，肚臍屬於任脈（無錯，係任督二脈既任脈），任脈起于胞宮（子宮），掌管生殖，寒氣下沉會令子宮收縮，形成痛經。點解短打加踢拖又吾得先，腳無子宮啦卦？其實下肢有好多同月經有關既經脈，好似足厥陰肝經、足少陰腎經、足太陰脾經等，經絡受寒不通，不通則痛；下肢佔全身既surface area約1/3，甘大面積受寒，身體内環境都會受影響，凍冰冰。

所以月經頭號敵人，一字既之曰：寒。

戒短打踢拖，寧願背心加長褲，共勉之！

以上資料由李上琦中醫師提供

 

女人之苦[一]。。。

女人同男人最大分別，就係會經歷經、帶、胎、產。未到十月懷胎十級痛，有d人已經被月經折磨得怕怕， so sad。好多d 阿媽就話：食白鳳丸啦。。飲姜茶啦。。飲紅棗水啦。。。。然後你就會冧，得吾得架？

 

其實除左要食mud食mud, 重要吾知岩吾岩自己，甘不妨係生活細節當中，留意平時有無做d影響經期健康（其實都闗日常健康事，人係整體黎架嘛）。無mud新鮮野，都係老生常談。

冷飲

雖然凍野真係好難克服，哈哈，但真係好毒。。大家都知黎m或者平時都唔好飲凍野，因爲寒性收引，中醫講“宮寒”， 子宮好似冰封甘（形象化左）。有無試過運動完，好熱既時候，鯨吞一杯冰水？個下冰涼既感覺可以由口腔直落到肚臍。明明d冰水最多落到胃姐，點解肚臍都有感覺？呢個就係中醫講既“氣”，寒性收引下沉，所以飲凍野寒氣都落到子宮。人覺得凍既時候，會攬住或捲埋身體，子宮都一樣，揦埋一住；經血遇冷都會變成血塊，就好似水遇冷變冰既道理，子宮需要更多力量，更揦埋一住將血塊逼出黎。子宮痙攣收縮係引起痛經既主因。

克服冷飲，共勉之！

 

以上資料由李上琦中醫師提供

 

 

生完仔係吾係要即刻補？

有人問，生完仔係吾係第1日就要即刻補？

 

其實一生完吾太適合立即進補，因爲無論順產同開刀，外陰或腹部都有傷口，加上有惡露排出 （惡露--胎盤移離後的一些殘留組織），太早進補可能令傷口出現痕，滲血，傷口可能埋得無甘好，太溫補亦可以導致惡露不斷，甚至有臭味。

所以生完至少要比產婦1個休養期
岩岩生完後體質虛弱，腸胃都需要休息，不適宜進補加重腸胃負擔（指用中藥材），產後大便難既情況都幾common, 又藥材湯又花膠， 甘滋膩大便好難通啵。進食以食物營養豐富爲主，係無感冒或其他吾舒服既情況下，可以飲小量雞湯、魚湯。直到血性及漿液性惡露停止，先好適量甘進補。

產婦生完之後，反而應該留意大小便通吾通， 惡露如何， 食欲好吾好，有無血壓異常、水腫等，吾好完全將產後調護側重曬去點補點補。

以上資料由李上琦中醫師提供

 

 

又到芒椰奶西，芒果綿綿冰的季節。。。

立夏過去，夏天已經來臨，行街行到周身汗，緊係搵個地方涼冷氣，歇一歇。吾想飲Starxxxk甘甜甘漏，甜品係一個吾錯既選擇。夏天芒果大當造，緊係叫下芒果pancake, 芒果綿綿冰呢d正野。但成日聼人講芒果濕熱濕熱，即係點啊？

老人家講既濕熱，指吃後出現腹痛、腹瀉，亦即係“屙濕熱”，這是因爲芒果含有粗纖維及黏液質多，促進腸胃蠕動、縮短排泄物在結腸內停留的時間有關，腸敏感者吃多了才會引起腹痛，大便較爛，一般人少量進食係無問題架。

至於有關食完芒果皮膚會很癢，甚至濕疹會發，係真吾係啊？其實好多有濕疹既人既體質，都屬於脾氣虛而夾濕 （not temper, ok?）。本人愚見，通常有芒果既甜品都凍既，凍野容易傷脾胃，脾胃氣虛令濕積聚，加重濕疹既情況。當然，亦有人有濕疹，但體質不屬於脾虛夾濕，所以食凍野 or 有芒果既凍野對皮膚影響不大。所以食芒果之後“濕熱”，應該吾係芒果本身的問題，而是體質本身不適合的問題，吾好賴個芒果啦。

資料由李上琦中醫師提供